Dáppe gávnnat dieđuid doarjja ja loatnaortnegiid birra.

Oahppodoarjagat


Norgga stáhta oahppoloatnakássa

Go Norgga beale studeanttat studerejit ollesáiggi dahje bealleáiggi Sámi allaskuvllas, de sis lea vuoigatvuohta oažžut oahppodoarjaga Stáhta oahppoloatnakássas. Oahppodoarjaga sáhttá ohcat njuolga neahta bokte dahje Sis-Finnmárkku studeantaovttastusa bokte. Stáhta loatnakássa ohcanáigemearit leat 15.11 (skábmamánu) čakčalohkanbadjái ja 15.03 (njukčamánu) giđđalohkanbadjái. Eambbo dieđut: www.lanekassen.no 


Doarjjaortnet Ruošša studeanttaid váste

Norgga stáhta oahppoloatnakássa sáhttá addit stipeandda ja loana Ruošša ja eará Gaska- ja Nuorta-Eurohpa ja ovddidanriikkaid studeanttaide. Oahppoprográmma galgá dábálaččat leat dohkkehuvvon oahppun, man vuođul lea vuoigatvuohta oažžut doarjaga Stáhta oahppoloatnakássas. Doarjaga sáhttá oažžut njealji jahkái.

 

Doarjjaortnet Ruoŧa ja Suoma studeanttaide

Ruoŧa ja Suoma studeanttat galget ohcat oahppodoarjaga ruovtturiikkas. Jus lea registrerejuvvon ja orron Norggas guhkit go 2 jagi, de lea vejolaš ohcat loana ja stipeandda Norgga stáhta oahppoloatnakássas. Oahppohálddahus sáhttá veahkehit studeanttaid oahpporuhtadanohcamiiguin vai sáhttet ohcat ruhtadoarjaga iežaset ruovtturiikkas. Ruoŧas: Centrala studiestödsnämnden, CSN, www.csn.se Suomas: KELA, www.kela.fi 


Norgga sámedikki stipeanda

Norgga sámediggi lea ásahan stipeandaortnega vissis fágasurggiin sámi fágabargiid váste. Sámediggi almmuha stipeanddaid jahkásaččat. Eambbo dieđuid gávnnat Sámedikki interneahttasiidduin.


Boazodoallo oahppostipeanda
Norgga studeanttat geat gullet boazodollui sáhttet ohcat oahppostipeanda Norgga Boazodoallohálddahusas. Eambbo dieđuid gávnnat dáppe: www.reindrift.no